هوجة كروية

ميه…ميه

فاكرين حلمنا بوطن عربى واحد

فاكرين والا نسيتوا ؟

طبعا كلنا بندعى إننا فاكرين وبندعى كمان إن فى وحدة قلب ولسان

هههههههههههههههههه

بصراحة حاجة تضحك

لو الأتنين دول متوحدين يبقى إحنا كابس علينا النوم ومزغلل عينينا ومش شايفين!!

أخر دليل على وحدة القلب واللسان ماتش كرة القدم المتوقع بين الجزاير ومصر واللى حاصل من الإعلام، تعبئة غريبة للشعبين ضد بعض ، حد يقوللى لمصلحة مين ؟

المصيبة لو حد قاللى الأمريكان ، أصل أمريكا أقرب شماعة نعلق عليها نتايج أحقادنا وخيبيتنا التقيلة

وتبقى أنقح لو وطنى واعى قال إسرائيل ، إعلامها بيوقعنا فى بعض

بيتهيألى إننا واقعين من غير مانحتاج لحد يوقعنا فى بعض

إمبارح كنت فى مشوار بالعربية وبأسمع أنغام عربية على العود ، إبنى صمم يسمع أغانى على الإف إم، وفعلا حولت من الكاسيت للراديو وكنت بأقلب بين المحطات  وخصوصا إن المشوار كان طويل والطريق زحمة موت ، المهم سمعت صوت مذيعة بترحب بأحد لاعبى كرة القدم المعروفين على مستوى العالم، قلت كويس أسمعه وخصوصا إنى زملكهلاوية صميمة ومعجبة بقدرتة على التنقل بين الفريقين فى السابق

شد ودنى كلام غريب عن الإعلام الجزايرى ومهاجمته لمصر وإن الموضوع خرج عن كونه كلام عن تحدى فى مباراة كرة قدم بين البلدين للخوض فى مصر وإننا مش لازم نسكت على كدا، إستغربت الكلام وزاد إنتباهى فلقيته بيقول إن مصر ليها فضل على كل العرب وإننا على عكس الجزائريين ماغيرناش لغتنا وكل المستعمرين إنجليز وفرنسيين ماقدروش يخلونا نتخلى عن لغتنا العربية .

كنت أتمنى إن المذيعين يكونوا على قدر أكبر من الإدراك لخطورة الكلام دا ، مش بس لأنه غير صحيح ، لأنه بيشعل مشاعر المواطن البسيط ضد الفريق الجزائرى وممكن يؤدى لمشاكل وتصرفات غير مسئولة تحط مصر فى موقف لا تحسد عليه وتصعب الموقف على أجهزة الأمن المكلفة بحماية الفريق الجزائرى لأنه ضيف ولأن مصر بلد معروف بحسن الضيافة ، مش بس كدا دا إستنكر على الجزائريين الموجودين فى مصر لحضور المباراة نزولهم لخان الخليلى وإنهم يغنوا والمذيعة تطوعت بدعوة كل المصريين إنهم ينزلوا لخان الخليلى ويغنوا هم كمان

حسيت بصعوبة الكلام دا وإنه بيؤجج مشاعر الشعب ضد الجزائريين وإستغربت

خصوصا وإن كل الكلام اللى إنقال مردود عليه بالتالى:

- بالنسبة للغة العربية فبأقول للاعب المشهور إنى بالصدفة قبل الإستماع للقاء المذكور مريت بجنازة لجماعة نوبيين ومافهمتش منهم كلمة واحدة ، كانت الستات بتندب بأسلوب غنائى جميل وكان نفسى أفهم حرف ومافهمتش.

ولو إتجه للغرب ح يلاقى قبائل بتتكلم بلغة  هى خليط من العربية ولغة البربر مش ممكن يفهمها بسهولة.

مصر أقرب للجزيرة العربية من الجزائر وطبيعى إن تأثرها باللغة العربية يكون أكبر.

الإستعمار الفرنسى إستعمار ثقافى وكل الشعوب اللى كانت تحت الإحتلال الفرنسى تجيد التكلم باللغة الفرنسية ، على عكس الإستعمار الإنجليزى الإقتصادى واللى بيمتص موارد البلاد المستعمرة دون الإهتمام بتثقيف شعوبها وتعليمهم لغته ، دا غير إن الفرنسيين مالحقوش يستعمرونا الفترة اللى يقدروا يأثروا علينا فيها ومع كدا سابولنا أعظم كتاب عن وصف مصر!!!!

الشعب الجزائرى قدم مليون شهيد ومصر والفنانين المصريين قدموا للجزاير أنجح فيلم عربى عرض قصة كفاح جميلة أبو حريد (أتمنى أكون كتبت الإسم صح) ، المناضلة الجزائرية المعروفة واللى درسنا عنها وعن قصة كفاحها فى دروس التاريخ المقررة.

لكن بعد كدا عرفت من متابعة الفضائيات إن دا رد على إدعاء الفريق الجزائرى بإنه تعرض للهجوم على الأتوبيس خلال نقله من المطار للفندق الموجود فى حرم المطار وإتصل بالفيفا وعمل دوشة وهدد بعدم اللعب إلا بعد تأمين حماية أمنية مكثفة!!!!

الواقعة دى مستبعدة وغير منطقية، الحماية الأمنية عندنا مكفولة لأى سائح وبحكم القانون ولدرجة تغيظ ، وكلام الفريق الجزائرى عن إختفاء سيارات الشرطة المكلفة بحماية الأتوبيس مش واقعى بالمرة وفيه إتهام لرجال الأمن المصريين بالتحالف مع البلطجة وإعطاءها الفرصة للهجوم على الفريق الجزائرى !!!!

ولو الكلام دا صحيح ليه أعضاء الفريق الجزائرى ماقدموش صور تدعم إدعاءاتهم ؟!! ، مؤكد إنهم معاهم موبايلات حديثة وفيها كاميرات قادرة على التصوير بالدقة الكافية .

مع معرفتى باللى حصل من الفريق الجزائرى مازلت بألوم على إعلامنا  ، من حقنا ننفى ونستنكر الإدعاءات الغريبة للفريق الجزائرى ، ومن حقنا نستنكر الهجوم على مصر من الإعلام الجزائرى ، لكن مش من حقنا نهاجم الشعب الجزائرى ونشكك فى عروبته حتى ولو كان دا رد على تطاول الإعلام الجزائرى على مصر والمصريين؛ لأننا شعب وبلد عريق حضارة ومكانة والأم مهما غلطوا فيها أولادها بتغفر وتسامح وتقابل الإساءة بالحب.

الجزائر بلد تانى لينا ، في صلة رحم بينا وبينهم من زمان، كتير من العائلات فى مصر من أصول جزائرية ومغربية ، الحجاج زمان كانوا بيمروا بمصر فى طريق الحج على الجمال والكتير منهم إستقر فى مصر فى طريق عودته .

وفى الجزائر عائلات من أصول مصرية ، أنا عمى هاجر للجزائر وإتجوز جزائرية وليا أولاد عم جزائريين .

يعنى صلة الرحم تجمعنا أكتر من اللغة والعروبة، فى دم بينا وبينهم ، نفس الدم بيجرى فى عروق الشعبين.

معقووووووووووووووول دا كله يهون فى لحظة وعشان إيه ؟!! مباراة كرة قدم، ح نموت بعض عشان نخرج نلاعب الفرق اللى حكوماتها إستعمرتنا فى الماضى ؟!!!!

بنتكلم ونقول ونكتب فى التاريخ وندون فى الأشعار مساوىء الإستعمار وإحنا مستعدين نعبر البحر المتوسط على جثث بعضنا عشان نوصل ونتقابل مع اللى إستعمرونا.

فى عز ماأنا مضغوطة ومتضايقة من اللى بيحصل لقيتنى بأدندن الأغنية الشهيرة للصوت الجبلى القوى ، لفهد بلان ؛ وحدة مايغلبها غلاب …..ههههههههههههههههه

غلاب مين ياعم فهد !!!

دى حتة كورة حقيرة مبقعة أبيض وإسود ، مالهاش زاوية تتسند عليها، غلبتها وداست عليها بالكاوتشى بتاع 22 لاعب محترف وإعلام بلدين بيتبارز فى الرد والردح على بعض.

قولولى ليه يحصل بينا كدا؟

ليه الدول الأجنبية على الرغم من تجاوز الجماهير المشجعة والحوادث اللى بتحصل فى الماتشات إلا إن تصرف اللاعبين والإعلام بيكون تصرف حضارى ؟!!!

العيب فى مين ؟!!فى الشعوب والا فى الإعلاميين والصحفيين وال….يين وال….ييين……..

بعد الكلام دا ياترى فضل منكم ناس مستبشرين بوحدة ممكن تكون ولو بالمشاعر بينا وبين بعض؟

حد يفهمنى ليه يحصل كدا ولمصلحة مين ولو بنتكلم عن الإستعمار اللى فرقنا ماهو غار من عشرات السنين ، الدول اللى إستعمرتنا زمان واللى ياما كان بينهم حروب ودم إتصالحوا وإتحدوا وإحنا …بندور على سبب مهما كان تافه عشان نقطع بعض .

تتحرق الكورة والمباريات الدولية ونفضل إخوات وشعوب متحابة والا إيه رأيكم ؟، ردوا عليا

يلا نغنى كلنا ، ندندن بصوت عالى

وحدة مايغلبها غلاب ..يدمرها لعب الأحباب

بذمتكم … دا هم يبكى والا هم يضحك ؟!!!